عندما تعشق المرأة تكون مبدعة بإخفاء حبيبها
قلتلها ليش القمر بفوت
ع غرفتك كل يوم متخفي
قالت إلي جوعان بدو قوت
وعطف وحنان وحضن وملفي
قلتلها يغفى بحضن الشمس
قالت إلي حضن الشمس حريق
خليه ع فرشة حواسي الخمس
نغفى سوى وعند المسا بنفيق
بنسهر سوى بخيمة ع كتف الليل
وبصف حولو رموش عينية
عسكر وحراس ومواكب خيل
يحموه من غدر الحرامية
قلتلها بيحكو عليك الناس
إن عرفوا في عندك ضيف على غفلة
قالت يروحوا يحاكموا الحراس
بتهمة قمر نام بحضن طفلة
قلتلها لما الطفل بجوع
ما بيشبعو إلا صدر إمو
قالت الو بحرق العشرة شموع
بوسوا بشموا بحضنو بضمو
قلتلها لا تطمعيه كتير
عشق الطيور بيبتدي بحبة
قالت ما نحنا أثنينا عصافير
بنتقاسم الحبة على المحبة
قلتلها حاج اتركيه يروح
بجوز عنو يسألوا أهلوا
قالت إلي أهلوا القلب والروح
بعيش بكنف أهلوا على مهلو
قلتلها عشقتي قمر تخمين
مالك حبيب ووردتك عذبة
قالت اضحكت عليك يا مسكين
وقصة أنا عشقت القمر كذبة
حيث القمر بفوت على كل بيت
من الباب والشباك مسمحلو
صورت حبيبي بصورتو خبيت
وصرت كل ليلة على عيون الناس
باب القلب والبيت إفتحلو
