بدي أنسى الناس كلها
ودوّر بحيطان الموت
على خيالي
دوّر بين قبور العتمة
ع قصور بيحملها العالي
وين العالي بين قبور
وقع العالي
وين خيالي بقلب العتمة
ضاع خيالي
راحو الناس بقلب ترابون
ومات الغالي
وضاع خيالي عند قصور هون
هني راحوا
وأنا عم اهرب من حالي
اطلعوا مني
لا تزوروني بقلب الذكرى
طلعوا مني
ما بدي يحبسني الماضي
و لا بدي يحرقني بكرى
اطلعوا مني
يا قلوب من الخشب القاسي يا مرايات
يا عروق الصوّان الأسود يا حكايات
يا قصص الحب العتيئة ونهايات
يا موجة بتشعل حريئة
وموجة بتغمر يلي مات
اطلعوا مني يا هالناس
اطلعوا مني
اللي ماتو
واللي بعدون بالحياة
اطلعوا مني
واللي زرعور
الحقد الغدر
الظلم القهر
اطلعوا مني
لا تزروني
لا بصوركم ولا بقصصكم
ولا بدفاتر زكريات
أنا مت وانتو متّو
وألف رحمة ع اللي مات
اطلعوا مني واتركوني
شجر واقف بالخريف
شجر يابس
راكع بسجدة رصيف
الله وحدو اللي عالم
واللي شايف
نبضة القلب اللي تعبت
و الحكي الواقف حزين
بين غمرات الشفايف
هالحكي صاير أنين
الله وحدو اللي عارف
اللي باقي موت بارد
اتركوني موت واحيا
بالحكي المثل السكين
اطعنوني
اطعنوني
باليسار وباليمين
وغرقوا هاالدنيا بعروقي
انتو الملاك
ووحدي إبليس اللعين
أنا الخطيئة
وانتو وحدكم مؤمنين
أنا العاصي
وانتو براءة صالحين
أنا يا أنبيا من الكافرين
بس اتركوني بدي أنسى
و لك آه يا مين يخليني أنسى
يا مين يخلي هالقلب
يمحي هاللين
ويرجع يقسى
كرهت حالي
كرهت حتى
إني دور على خيالي
ما بقى بالقلب نبضة
كلوا راح
خلي هالليل اللئيم
يسكّر جفون الصباح
كلوا راح
والشمع فتح عيونوا
على هبّات الرياح
كلوا راح
اطفي يا شمسي بنارك
واكوي جلدي والجراح
بهالدنيا الطيب بيموت
والظالم ح يعيش مرتاح
بدي أنسى الناس كلها
بدي أنسى المسرحية
مسرحية الدنيا كلها
مسرحية
والثعلب هو بطلها
والطيب هو الضحية
مسرحية
من الصبح حتى عشيّة
الناس بتصفق للظالم
و بتنسى تدفن هالضحية
بدي أنسى الناس كلها
و بدي أنسى المسرحية
