أحمد : شوبك يا أخي عم بتنفخ وكأن ميت
ابنك أو أخوك ,احكي وفش قلبك بترتاح
محمد: أول كل شيء أنت مع مين يعني أنت (مع أو ضد ) .
أحمد :أنا يأخي لاني مع ولاني ضد ,أنا طول عمري ماشي الحيط الحيط وعم قول يا رب
سترك .
محمد : طيب ليش ما عم تحكي أنت من شو خايف
أحمد : بصراحه أنا خايف منك ,لاننا نحنا في هل وقت الناس كلهم (يا مع يا ضد ) أو من
جماعة هدوك يلي خطن نضيف
محمد : احكي يا أخي يلي مضايقك زاعجني ويلي جارحك عم يؤلمني ونحن في الهوى سوا .
أحمد :ما بحكي حتى تأكد بأن أنت (لا مع ولا ضد) ولا من جماعة هدوك يلي خطن نضيف
و لانك مدعوم ولا وراك حدا.
محمد :هات شو قصتك والله لاني مدعوم ولا وراي حدا .
أحمد :أنا يا أخي موظف قصدي كنت موظف, وشي واحد ابن حلال من هدوك يلي خطن نضيف
بيتوصى فيني, وإذ بيطلبوني هدوك رحت لعندهم وبعد أسبوع قالوا مع السلامة والله معك
قلنا الحمد لله , ورجعت على دوامي وإذا بالمدير بيطلبني وبقول أنت كنت موقوف ونحن
ما منحسن من رجعك على العمل حتى هدوك يخبرونا , رجعت لعند هدوك قالوا نحن منخبرهم
وما بين هدوك وهدول صرلي سنة عاطل عن العمل , وأنت تعرف أنا ما عندي غير راتبي
والله صفيت على الحديدة يا أخي . تصور الناس صاروا يتصدقوا علي ويعطوني الذكاة ...وأنت
شو قصتك.
محمد:أنت قصتك بسيطة كتير إلا ما يجي يوم وهدوك يخبروا هدول وترجع إلى وظيفتك , بس
أنا راحت علي, أنا كنت ملك زماني ومرتاح بيت وسيارة ومحل تجاري وأكثر من صديقة على
الفيس وعندي عمارة كنت تاجر كبير.
وفي يوم ما سمعنا وإلا بهدوك هجموا علينا اجو هدول حتى يدافعوا عنا وعلقت ما بين
هدول وهدوك . وإذ بطلقة هاون على البيت وعلى المحل وطار كل شيء , قالوا أنت متضرر
وبيطلعلك تعويض راجع هدوك , راجعت هدوك , والحمد لله نزلت لجنة وكشفت على الأضرار
وقدروا المبلغ قلت الحمد لله بنستر وجهنا فيه , راجعت هدوك حتى استلم المبلغ قالوا
حتى تجي الأوراق من عند هدوك انتظر . وحتى الآن عم انتظر الأوراق والله لو على ظهر
سلحفات لوصلت الأوراق
أحمد: عندي الحل شو رأيك يلي يرجعلك كل شيء خسرت وتعيش حياة حلوى .
محمد :الله وأيدك .
أحمد :أنا أو انت وكل واحد منا شنته صغيرة إلى اقرب حدود وبعدها نركب البحر إلى
ايطاليا ومنها إلى السويد وأنا بجرح أيدي وأنت بتجرح أجرك ونقول الحرب خربت بيوتنا
, وهنيك بيعطونا بيت وسيارة وراتب والعملة باليورو اليوم اليوروا ب250 ليرة وخود
بدال البنت عشرة شقر وعيون زرق .
محمد : يعني نروح تهريب ونعرض حياتنا للخطر أو الموت
أحمد: ليش أنت حياتك مو معرضة للخطر وللموت عشرات المرات في اليوم
محمد: والله ما بعرف بهاجر وبعرض حياتي للموت ,أو ببقى هون ببلدي ولو حياتي تتعرض
للخطر عشرات المرات في اليوم .....((لست ادري أرشدوني))
https://www.facebook.com/you.write.syrianews
