حكايا المساء
العريس
يامحمم العريس ارفع ايدك...............لاتوجع العريس الله يزيدك
يامحمم العريس هات العطر.............لرشرش حبيبي ضبي العفر
نعيما يمى .......نعيما يا عريس
سبع وعشرين سنة استنيت لحتى اقلك هالكلمة نعيما يا عريس ....... نعيما يا حبيبي
هات ايدك يمى , هذا الخاتم وصاني ابوك (الله يرحمه ) البسك ياه يوم عرسك
ما أحلاه بايدك , وما أحلاك كلك
وجهك ابيض وأحلا من بدر السما
خلص يا شباب بيكفي تشكوه بالدبابيس , والله ان شكيتوه بمسله ما رح يقول آه
ربيته رجال .....احلى رجال
بتتذكر يا عمتي يوم حلف انه ما تلمس رجليك الارض يوم عرسك وشالك عكتافه من بيتكم لبيت العروس
اليوم اجا دورك ودور كل رفقاته تردوله الدين يوم عرسه , ما اله غيركم لا اب ولا اخ ولا اخت
احملوه عكتافكم مثل ما حملكم
وانت يا عمتي لا تزعلي بعرف انك بتحبيه بس هي قسمته وهذا نصيبه
وانت بكرا بيجي نصيبك بتحبي وبتتزوجي و بتولدي وبتربي .................وبتنسي
يالله ياشباب شيلو العريس
ويا مرحبا بالعريس وأهلا وسهلا بالعريس
ويا مرحبا بالعريس وأهلا سهلا بالعريس
(وهنا استميحكم العذر قرائي الاعزاء فلن أستطيع ان انقل اليكم بالكلمات جمال اللوحة الراقصة التي أدتها في ساحة القرية وسط ذهول الحضور )
دون موسيقى أو غناء
فقط رقصت بصمت ...
سنواتها الستون اضافت وقارا رائعا على حركاتها الجميله
منديلان ابيضان في يديها يعلنان الهدنة مع كل عين حاسدة او نفس غيورة
قدماها العاريتان تلمسان التراب كشفتي ام تقبل جسد ابنها
ابتسامتها الهادئة امتزجت بتناسق غريب مع دموع عينيها
وعند انتهاء مراسم الاحتفال وقفت لتقبل التهاني
مبروك عرسكم عمه
مبروك عرس ابنكم
............ مبروك عرس الشهيد...............
الله يعطيك العافية..القصة رااااائعةومؤثرة وأبعادها عميقة كتير،بتعجبني قفلاتك للقصص اللي بتكتبها،بس للفضول أنت من أي محافظة؟و"العرس" من الخيال ولا true story؟ و ملاحظة بسيطة انتبه للهمزات والحركات والشدات...أتمنى أن تتقبل مروري..بانتظار المزيد..